Sosial ədalətin, əmək hüquqlarının və işçinin alın tərinin qorunması cəmiyyət üçün fundamental dəyərlər hesab olunsa da, görünən odur ki, bəzi şirkətlər bu prinsipləri açıq şəkildə tapdalamaqda davam edir. Redaksiyamıza daxil olan son şikayət də məhz bu cür ciddi qanun pozuntularının mövcudluğundan xəbər verir.
Alyans.media – ya gələn şikayətə əsasən məlum olub ki, “Guavalab” MMC 2025-ci ilin sentyabr ayından etibarən əməkdaşlarına əməkhaqqı ödəmir. Şikayətçilərin sözlərinə görə, aylarla davam edən bu vəziyyət onlarla işçini ağır maddi və sosial durumla üz-üzə qoyub.
Müraciətdə qeyd olunur ki, bəzi əməkdaşlar işdən çıxarılsa da, onlara nə əməkhaqları, nə də qanunvericiliyin tələbinə uyğun kompensasiyalar verilib. Daha ciddi məqam isə ondan ibarətdir ki, işçilərin şirkət rəhbərliyi ilə əlaqə yaratmaq cəhdləri zəng və mesajların cavabsız qalması səbəbindən nəticəsiz olub.
Şikayətdə bildirilir ki, məsələ ilə bağlı Əmək Müfəttişliyi və prokurorluq orqanlarına müraciətlər edilsə də, indiyədək hər hansı real nəticə əldə olunmayıb. İşçilər bu durumu açıq-aşkar haqsızlıq və məsuliyyətsizlik kimi qiymətləndirir, aidiyyəti qurumların məsələyə biganə qalmasından narahat olduqlarını vurğulayırlar.
Şikayətçilər əməkhaqlarının dərhal ödənilməsini, qanun pozuntularına hüquqi qiymət verilməsini və məsul şəxslər barəsində tədbir görülməsini tələb edirlər.
Redaksiyamız məsələni diqqətdə saxlayır və qarşı tərəfin mövqeyini dərc etməyə hazırdır.
