Yaxın Şərqdə davam edən humanitar böhran və Qəzzanın gələcək taleyi ilə bağlı beynəlxalq müzakirələrin intensivləşdiyi bir dövrdə Azərbaycanın bu proseslərdə fəal mövqe sərgiləməsi diqqət çəkir. ABŞ Prezidenti Donald Trampın Qəzzanın yenidən bərpası və idarə olunması məqsədilə yaratdığı Sülh Şurasına Azərbaycanın təsisçi üzv kimi qoşulması rəsmi Bakının regional və qlobal proseslərə yanaşmasının növbəti nümunəsi kimi qiymətləndirilir.
Məsələ ilə bağlı Alyans.media olaraq politoloq Turan Rzayevin bu mövzuya bağlı fikirlərini öyrəndik. Politoloq azərbaycanın bu qərarının arxasında dayanan siyasi və diplomatik motivləri bizim üçün şərh etdi.
“Bakı bu təşəbbüsü hərbi və ya blok xarakterli qurum kimi deyil, məhz Qəzzanın yenidən bərpasına və idarə olunmasına yönəlmiş mexanizm kimi dəyərləndirərək qəbul edib. Onun fikrincə, Azərbaycan üçün əsas məqam prosesin mahiyyətidir”.
Turan Rzayev xatırladır ki, “Rəsmi Bakı daha əvvəl BMT Təhlükəsizlik Şurasında Qəzzada Beynəlxalq Sabitləşdirmə Qüvvələrinin yerləşdirilməsi ilə bağlı ABŞ-ın təqdim etdiyi qətnaməni dəstəkləsə də, bölgəyə hərbi kontingent göndərməkdən imtina edib. Eyni zaman da Azərbaycan son illər beynəlxalq müstəvidə post-münaqişə təcrübəsinə malik, neytral və konstruktiv aktor kimi qəbul olunur. Ümumən belə platformalarda iştirak həm ölkənin beynəlxalq nüfuzunu gücləndirir, həm də Qarabağda əldə edilən bərpa və yenidənqurma təcrübəsinin paylaşılması baxımından mühüm imkanlar yaradır”.
Turan Rzayevin fikrincə, “Bu addımın digər mühüm tərəfi Azərbaycanın Vaşinqtonla münasibətlərə verdiyi xüsusi əhəmiyyətlə bağlıdır. Trampın şəxsi təşəbbüslərinə yaxın mövqedə olmaq Bakıya ABŞ siyasi dairələrində əlavə manevr imkanları qazandıra bilər. Bu səbəbdən Azərbaycan təklifi həm diplomatik balansı qorumaq, həm də beynəlxalq proseslərdən kənarda qalmamaq məqsədilə qəbul edib”.
Politoloq onu da əlavə edir ki, “Qəzza məsələsi Azərbaycanın xarici siyasətində prioritet istiqamət olmasa da, diqqətlə izlənilən mövzulardandır. Bu proses həm İslam dünyası, həm də xüsusilə Türkiyə kontekstində Bakı üçün əhəmiyyət daşıyır. Onun sözlərinə görə, bəzi iddiaların əksinə olaraq, Azərbaycan Fələstin–Qəzza məsələsinə biganə deyil və müttəfiqi Türkiyənin həssas yanaşdığı mövzulara müttəfiqlik ruhunda münasibət sərgiləyir”.
