Məhkəmə qərarları yalnız kağız üzərində qalmamalıdır – onlar dövlətin adından çıxarıldığı üçün məcburi xarakter daşıyır və icrası ciddi nəzarət altındadır. Vətəndaşların hüquqlarının qorunması və dövlətin ədalətini təmin etmək məqsədilə icra məmurlarının fəaliyyəti böyük önəm kəsb edir.
Bəs görəsən, bu qədər məsuliyyətli işi görən icra məmurları niyə bəzən məsuliyyətsizlik edirlər? Qanun onlar üçün qanun deyilmi?
Elə bu suallara açıqlıq gətirmək üçün Alyans.media olaraq hüquqşünas Ramil Süleymanova müraciət etdik. O da öz növbəsində bildirdi ki..
“Azərbaycan Respublikasında məhkəmə qərarlarının icrası dövlətin adından həyata keçirilir və buna görə də vətəndaşlar tərəfindən məcburi şəkildə yerinə yetirilməlidir. Bu prosesə birbaşa nəzarət edən icra məmurları, həmçinin məsuliyyət daşıyırlar. İcra məmurları, icraatına verilmiş işlərlə bağlı öhdəliklərini yerinə yetirməyən vətəndaşlara qarşı Azərbaycan Respublikasının qanunlarına uyğun olaraq müvafiq məhdudiyyət tədbirləri tətbiq etmək və qərarların icrası üçün zəruri addımlar atmaqla məsuldurlar. İcra məmurlarının işlərə etinasız yanaşması və ya dövlət adından çıxarılmış məhkəmə qərarlarını icra etməməsi onların məsuliyyətsizliyi hesab olunur. Vətəndaşlar, hüquqlarının pozulduğunu düşünürlərsə, Azərbaycan Respublikasının Ədliyyə Nazirliyinin İcra Baş İdarəsinə şikayət ərizəsi ilə müraciət edə bilərlər. Bu zaman ərazi üzrə kurator nəzarətçi və İcra Baş İdarəsinin rəhbərliyi tərəfindən icra məmurunun hərəkətləri qiymətləndirilir. Pozuntular aşkar edilərsə, müvafiq sənədləşdirmə aparılaraq icra məmuru məsuliyyətə cəlb oluna bilər. Eyni zamanda, ölkədə icra məmurlarının iş yükü həddən artıq yüksəkdir və bəzi icra şöbələrində işçilərin sayı iş yükünə uyğun deyil. Bu baxımdan, Ədliyyə Nazirliyi tərəfindən əmək haqqı, bonus və stimullaşdırıcı siyasət tətbiq edilməklə hüquqşünasların sahəyə cəlb olunması mümkün olacaq.
Qeyd edək ki, 2025-ci ildə qüvvəyə minmiş “Xüsusi İcra Məmurları” haqqında qanun, məhkəmə qərarlarının icrasını təşviq edəcək və icra məmurlarının fəaliyyətini daha da effektivləşdirəcəkdir”.
