Dövlət maliyyə idarəçiliyində illərdir müzakirə olunan şəffaflıq, operativlik və təhlükəsizlik problemlərinin həlli üçün yeni mərhələ başlayır. Rəqəmsallaşmanın dərinləşdirilməsi fonunda tətbiq edilən “Rəqəmsal dövlət maliyyəsi” sistemi dövlət vəsaitlərinin idarə olunmasında köklü institusional dəyişikliklər vəd edir.
Bu barədə Alyans.media – ya açıqlama verən İKT üzrə ekspert Elvin Abbasov qeyd edib ki, yeni sistem maliyyə axınlarına real vaxt rejimində nəzarəti təmin etməklə yanaşı, kiber-təhlükəsizlik baxımından da ən müasir beynəlxalq standartlara əsaslanır.
İKT üzrə ekspert Elvin Abbasovun sözlərinə görə, yeni “Rəqəmsal dövlət maliyyəsi” sistemi mövcud elektron hesab sistemləri ilə vahid milli inteqrasiya platforması və “Data Bus” (Məlumat şini) texnologiyası üzərindən mərkəzləşdirilmiş şəkildə birləşdiriləcək. Bu yanaşma xəzinədarlıq, büdcə planlaması və satınalma modulları arasında məlumat mübadiləsini real vaxt rejimində təmin edərək dövlət vəsaitlərinin hərəkətinin anlıq izlənməsinə imkan verəcək.
Açıqlamada qeyd olunub ki, xarici mühasibat proqramlarının sistemə inteqrasiyası OAuth 2.0 və mTLS kimi yüksək təhlükəsizlik protokollarına əsaslanan RESTful API şlüzləri vasitəsilə həyata keçiriləcək. Bu isə məlumatların vahid UBL formatında, kənar müdaxilələrdən qorunaraq avtomatik və təhlükəsiz ötürülməsini təmin edəcək.
Elvin Abbasov xüsusilə sistemin kiber-dayanıqlılığı məsələsinə diqqət çəkərək vurğulayıb ki, istismardan öncə və istismar dövründə peşəkar sızma testlərinin (penetration testing) aparılması və davamlı monitorinq mexanizmlərinin qurulması əsas strateji prioritetlər sırasındadır.
Onun sözlərinə görə, bu çərçivədə süni intellekt əsaslı SIEM və SOAR sistemləri tətbiq olunacaq və şəbəkədəki bütün əməliyyatlar, eləcə də giriş cəhdləri 24/7 rejimində anomal davranışlara qarşı nəzarətdə saxlanılacaq. Nəticədə həm daxili istifadəçi riskləri, həm də xarici kiberhücumlar anlıq aşkarlanaraq bloklanacaq.
Açıqlamanın sonunda Elvin Abbasov qeyd edib ki, yeni “Rəqəmsal dövlət maliyyəsi” sistemi dövlət maliyyə məlumatlarının bütövlüyünün, konfidensiallığının və təhlükəsizliyinin qorunmasını ən yüksək səviyyədə təmin etməklə yanaşı, maliyyə idarəçiliyində şəffaflıq və hesabatlılığı əhəmiyyətli dərəcədə gücləndirəcək.
