“Qarabağ”ın UEFA Çempionlar Liqasında İngiltərənin nəhəng klubu “Liverpul”a qarşı keçirdiyi oyun ətrafında yaranan müzakirələrə keçmiş futbol funksioneri Ceyhun Sultanov da münasibət bildirib. O, Alyans.media – ya verdiyi açıqlamasında nəticənin ağır olmasına baxmayaraq, bu məğlubiyyətin sensasiya kimi təqdim edilməsini yanlış saydığını və “Qarabağ”ın Avropa arenasında qazandığı statusun gözardı edilməməli olduğunu vurğulayıb.
Ceyhun Sultanov bildirib ki, qarşılaşmadan öncə gözləntilər real olmalı idi:
“Oyunla bağlı gözləntilər normal idi. Qarabağ Liverpula qarşı oynayırdı. Düzdür, bundan əvvəlki oyunlarda rəqibləri məyus edə bilmişdik. Amma ‘Enfild’de Liverpulu məğlub etmək, ya da heç-heçə oynamaq çox çətin görünürdü. Böyük hesablı məğlubiyyəti də normal qarşılayıram. Çünki İngiltərənin, hətta Avropanın ən güclü klublarından birinə qarşı oynamaq asan deyil”.
Sultanov qeyd edib ki, oyuna yalnız hesab prizmasından baxmaq düzgün olmaz:
“Hamıya asan gəlir demək ki, Qarabağ zəif rəqiblərdən xal aldı, Liverpula isə 6:0 uduzdu. Bu, yanlış yanaşmadır. Mənə görə bu tam normaldır. Əsas bundan sonrakı rəqibimizin kim olacağıdır. Qarabağ bura qədər gəlibsə, deməli, buna layiqdir. İstərdim ki, 1/16 final mərhələsində Qarabağa çox güclü komanda düşməsin. Çünki top klublarla, üstəlik səfərdə oynayanda belə nəticələr qaçılmaz olur.”
Sonda Ceyhun Sultanov komandaya dəstəyini ifadə edib:
“Nə deyə bilərəm? Qarabağa yalnız uğurlar arzulayıram.”
Ülkər Rəhmanqızı
