Bu gün “İdrak” liseyində şagird müəllimi tərəfindən güllələnib. 10-cu sinif şagirdi 29 yaşlı müəlliminə ov tüfəngi ilə atəş açaraq ona xəsarət yetirib.
Alyans.media xəbər verir ki, Modern.az məsələnin hüquqi tərəfi ilə bağlı araşdırma aparıb.
Hadisə ilə bağlı açıqlama verən hüquqşünas Ramil Süleymanov bildirib ki, Azərbaycan Respublikasının Cinayət Məcəlləsinin 20-ci maddəsində göstərilir ki, cinayət törədən şəxs 16 yaşı tamam olubsa, o cinayət məsuliyyətinə cəlb olunur.
“Amma 14 yaşı tamam olan şəxslər də qəsdən adam öldürməyə, qəsdən sağlamlığa ağır xəsarət yetirmə, adam oğurluğu kimi hallarda məsuliyyətə cəlb oluna bilərlər. Ümumiyyətlə, yetkinlik yaşına çatmayan şəxslərlə bağlı həm cəzalar təyin olunur, həm də tərbiyəvi xarakterli məcburi tədbirlər tətbiq oluna bilər. Bu zaman cərimə, islah işləri, ictimai işlər, azadlığın məhdudlaşdırılması və ya müəyyən müddətdə azadlıqdan məhrumetmə cəzaları nəzərdə tutulub”.
Ekspert ölüm halında cinayət maddəsinin ağırlaşdırıldığını bildirib.
“Ölüm halında bu adam öldürmə cinayəti hesab olunur və Azərbaycan Respublikasının Cinayət Məcəlləsinin ilkin halda 120.1-ci maddə ilə cinayət işi başlanacaq. Sonradan əməl daha ağırlaşdırıcı maddələrə tövsif oluna bilər. Amma bu maddənin sanksiyasında azadlıqdan məhrum etmə cəzası nəzərdə tutulduğu üçün şəxsə (burada) cəza 10 ildən artıq olmayan müddətdə olacaqdır. İlk dəfə törədilən cinayət kimi cəzasını ümumi rejimli tərbiyə müəssisəsində çəkə bilər”.
