Bir neçə gün əvvəl saytımızda cərrah Rauf Xəlilov barədə redaksiyamıza daxil olmuş şikayət əsasında material dərc olunmuşdu. Həmin yazıda müraciət edən tərəfin iddiaları ictimailəşdirilmiş, məsələ ilə bağlı səsləndirilən narazılıqlar oxucuların diqqətinə çatdırılmışdı. Qarşı tərəfin mövqeyini öyrənmək məqsədilə dərhal əlaqə yaratmağa cəhd göstərilsə də, ilkin mərhələdə həkimin köməkçisi zənglərimizi cavablandırmamış, bu səbəbdən rəsmi münasibət almaq mümkün olmamışdı. Nəticədə xəbər birtərəfli təqdim edilən məlumatlar əsasında yayımlanmışdı.
Daha sonra redaksiya olaraq məsələni daha əhatəli və obyektiv şəkildə araşdırmağı qərara aldıq. Təkrar əlaqə cəhdlərimiz nəticə verdi və qarşı tərəflə görüş təşkil olundu. Araşdırma çərçivəsində həkimin fəaliyyət göstərdiyi HTC Klinikasında olduq, səsləndirilən iddialarla bağlı yerində araşdırma apardıq, tibbi proses və sənədlərlə tanış olduq, mövqe və izahatları dinlədik.
Görüş zamanı bildirildi ki, məsələ konkret bir pasiyentlə bağlı yaranmış narazılıqdan qaynaqlanır. Həkimin sözlərinə görə, əməliyyatdan sonra yaranmış vəziyyətlə əlaqədar pasiyentə əlavə tibbi müdaxilə təklif olunub və bu prosedur icra edilib. Qeyd olundu ki, bütün əməliyyatlar qüvvədə olan tibbi standartlara uyğun, lazımi müayinələr və razılıq prosedurları əsasında həyata keçirilib. Həkim iddiaların bir qisminin reallığı əks etdirmədiyini, tibbi proseslərin isə şəffaf şəkildə aparıldığını vurğulayıb.
Diqqətçəkən məqamlardan biri də redaksiyamıza müraciət edən şəxsin sonradan təqdim etdiyi yazışmaları və səs qeydlərini qarşılıqlı şəkildə silməsi, eləcə də adının açıqlanmamasını xahiş etməsi olub. Buna baxmayaraq, müxtəlif platformalarda iddiaların səsləndirilməsinin davam etdiyi bildirilib. Bu hal məsələni daha diqqətlə və balanslı şəkildə araşdırmağı zəruri edib.
Araşdırma zamanı bir neçə digər pasiyentlə də əlaqə saxladıq. Danışdığımız şəxslər əməliyyat prosesi, tibbi xidmətin təşkili və əldə olunan nəticələrlə bağlı müsbət fikirlər səsləndirdilər. Onlar həkimin peşəkar yanaşmasından, pasiyentlə ünsiyyətindən və sonrakı nəzarət mərhələsindən məmnun qaldıqlarını ifadə etdilər.
Sonda onu da vurğulamaq istərdik ki, məsələyə yenidən qayıdaraq əlavə araşdırma aparmağımız, qarşı tərəfin mövqeyini əldə etməyimiz və ilkin materialı daha geniş kontekstdə təqdim etməyimiz redaksiyanın peşəkar, prinsipial və obyektiv yanaşmasının göstəricisidir. Media olaraq məqsədimiz faktları dəqiqləşdirmək, bütün tərəfləri dinləmək və ictimaiyyətə balanslı informasiya təqdim etməkdir. Bu yanaşmanı fəaliyyətimizin əsas prinsipi kimi bundan sonra da qoruyub saxlayacağıq.
