ABŞ və İsrailin İrana qarşı həyata keçirdiyi hücumlar zamanı həyatını itirdiyi bildirilən İranın ali dini lideri Ayətullah Seyid Əli Xameneinin niyə sığınacaqda deyil, iqamətgahında olduğu ilə bağlı yeni məlumatlar yayılıb.
Alyans.media xəbər verir ki, İranın Ali Milli Təhlükəsizlik Şurasının katibi Əli Laricani bildirib ki, Xamenei sığınacaqda gizlənməyi qəbul etməyib. Onun sözlərinə görə, ali dini lider həyatını əvvəlki kimi davam etdirməkdə israr edib və təhlükəsiz yerə keçməkdən imtina edib.
Eyni zamanda, Xameneiyə qarşı ABŞ və İsrailin birgə həyata keçirdiyi əməliyyatın bəzi detalları da ortaya çıxıb. Məlumata görə, İsrail hərbi təyyarələri onun iqamətgahına 30 bomba atıb. Hücum zamanı Xameneinin qızı, kürəkəni, nəvəsi və gəlini ilə birlikdə həyatını itirdiyi iddia olunur. Bildirilir ki, dağıntılar altından çıxarılan cənazədə qəlpə izləri aşkar edilib və həmin görüntülərin İsrailin baş naziri Benjamin Netenyahu və təhlükəsizlik rəsmilərinə təqdim olunduğu irəli sürülür.
İclas zamanı hücum edilib
ABŞ-ın The Wall Street Journal nəşrinin yazdığına görə, əməliyyat üçün gün və saat xüsusi dəqiqliklə seçilib. Xamenei və İranın yüksək vəzifəli siyasi-hərbi rəhbərliyinin iclas keçirdiyi şənbə günü, yerli vaxtla saat 10:00-da hücum həyata keçirilib. İsrail qırıcılarının atdığı bombalar iqamətgahı tamamilə dağıdıb.
Hücum zamanı Xameneinin yaxın müşaviri Əli Şamxani İnqilab Keşikçiləri Korpusunun komandanı Məhəmməd Pakpur və İranın müdafiə naziri Əmir Nasirzadənin də öldüyü bildirilir.
Əməliyyat aylarla planlaşdırılıb
Məlumata görə, yüksək səviyyəli hədəfləri əhatə edən bu əməliyyat aylar əvvəl hazırlanıb. Planlaşdırma prosesində İsrailin baş qərargah rəhbərliyi, hava qüvvələrinin komandanlığı və Mossad rəhbərliyi iştirak edib.
İddialara görə, İsrailin baş naziri Benjamin Netanyahu ötən ilin dekabrında Floridada ABŞ-ın keçmiş prezidenti Donald Trump ilə görüş keçirib və İranın nüvə proqramının davam edəcəyi halda hərbi müdaxilənin mümkünlüyü müzakirə olunub.
Qeyd edək ki, İran dövlət mediası Ayətullah Xameneinin hücum zamanı həyatını itirdiyini təsdiqləyib. Ölüm xəbərindən sonra ölkədə 40 günlük yas elan edilib, həmçinin ölkə üzrə 7 günlük rəsmi tətil qərarı verilib.
Sevinc Yarməmmədova
