Torpaq Çərşənbəsi Novruzun ən dərin, ən ağır, amma bir o qədər də ümidli nəfəsidir. Bu gün torpaq oyanır – sanki uzun bir yuxudan qalxır, sinəsini geniş açır və yeni həyatın toxumlarını qucaqlamağa hazırlaşır. İnsan da bu oyanışın bir parçasına çevrilir; çünki torpaq yalnız ayağımızın altı deyil, həm də ruhumuzun yaddaşıdır.
Alyans.media bildirir ki, qədim inanclara görə, məhz bu çərşənbədə yer ana canlanır. Əkin-biçin üçün ən uğurlu zamanın yaxınlaşdığına işarədir bu gün. Kəndlərdə insanlar torpağı əzizləyir, onu şumlayır, ilk toxumları səpir, sanki gələcəyin ümidini torpağa pıçıldayırlar. Şəhərdə isə bu gün daha çox rəmzi anlam daşıyır – evlər təmizlənir, həyətlər səliqəyə salınır, köhnəliklərdən qurtulmaqla yeni başlanğıclara yer açılır.
Torpaq Çərşənbəsi həm də bağışlama günüdür. İnsanlar küsülüləri barışdırır, inciklikləri torpağa tapşırır. Çünki torpaq hər şeyi qəbul edir, amma eyni zamanda yenisini də bəxş edir. Bu gün sanki hamıya deyir: “Burax keçmişi, yenidən başla.”
Axşam düşəndə yandırılan tonqalların istisi torpağın qəlbinə hopur. İnsanlar o alovun üzərindən atlanarkən yalnız pisliklərdən yox, həm də içlərində yığılan ağırlıqlardan xilas olmağa çalışır. Sanki hər atlayış bir az daha yüngülləşdirir insanı.
Torpaq Çərşənbəsi bizə sadə bir həqiqəti xatırladır: haradan gəldiyimizi unutsaq, hara gedəcəyimizi də tapa bilmərik. Torpaq səssizdir, amma hər şeyi danışır. Ona toxunan, onu anlayan hər kəs isə həyatın ritmini bir az daha dərindən hiss edir.
