Milli Məclisin bu gün keçirilən iclasında “Əmək Məcəlləsi” və “Narkoloji xidmət və nəzarət haqqında” qanuna dəyişikliklər müzakirə olunub. Müzakirələr zamanı deputat Göydəniz Qəhrəmanov bildirib ki, nikah bağlanarkən tibbi arayışla yanaşı narkoloji tibb müəssisəsinin verdiyi müayinə rəyinin də təqdim olunması məqsədəuyğun olardı.
Alyans.media xəbər verir ki, hüquqşünas Ramil Süleymanov AZXEBER.COM-a açıqlamasına görə, narkomaniyadan əziyyət çəkən şəxslərin nikaha daxil olmaları məqsədəuyğun deyil:
“Bu gün ölkədə narkomaniyanın statistik göstəriciləri ciddi şəkildə yüksəkdirsə, təbii ki, narkomaniyadan gizli və ya açıq şəkildə əziyyət çəkən şəxslərin nikaha daxil olmaları məqsədəuyğun sayılmır. Çünki belə hallarda onların nikaha girməsi nəticəsində dünyaya gələcək uşaqların sağlamlıq riskləri artmış olur. Bu da gələcəkdə daha ciddi sosial problemlərin yaranmasına səbəb ola bilər. Narkomaniya təkcə kişilər arasında deyil, qadınlar arasında da günbəgün artmaqdadır. Ona görə də nikaha daxil olan hər iki şəxsin mütləq qaydada narkoloji müayinədən keçməsi vacibdir. Əgər hər hansı şəxsdə narkomaniya xəstəliyi aşkar olunarsa, həmin şəxslərin nikahının dövlət qeydiyyatına alınmasından imtina edilməsi məqsədəuyğun hesab oluna bilər”.
O bildirib ki, bununla bağlı inzibati məsuliyyət tədbirlərinin də tətbiq olunması doğru olardı:
“Hətta bununla bağlı inzibati məsuliyyət tədbirlərinin də tətbiq olunması zəruri ola bilər. Bununla yanaşı qeyd etmək lazımdır ki, narkomaniya xəstəliyindən əziyyət çəkən şəxslər müəyyən reabilitasiya proqramlarına cəlb olunmaqla və müalicə nəticəsində tam sağala bilirlər. Buna görə də sağaldıqdan sonra həmin şəxslərin nikaha daxil olmaları və nikahın dövlət qeydiyyatına alınması mümkün ola bilər”.
