Nəsimi rayon İcra Hakimiyyəti və Müdafiə Nazirliyinin birgə təşkilatçılığı ilə Nizami Kino Mərkəzində “Zəfər Bayrağı altında Zəfərdən-Zəfərlərə!” adlı tədbir keçirilib.
Alyans.media xəbər verir ki, tədbirdə Nəsimi rayon İcra Hakimiyyətinin, Müdafiə Nazirliyi Şəxsi Heyət Baş İdarəsinin, YAP Nəsimi rayon təşkilatının rəhbərliyi, Müdafiə Nazirliyinin məsul əməkdaşları, rayonun hüquq-mühafizə orqanlarının rəhbərləri, elm, mədəniyyət xadimləri, şəhid ailələri, müharibə iştirakçıları (qazilər) və ictimaiyyət nümayəndələri iştirak edib.
Öncə tədbir iştirakçıları Mərkəzin foyesində Uşaq İnkişaf Mərkəzinin gənc yetirmələrinin əl işlərindən ibarət sərgiyə baxış keçiriblər.
Sonra “8 noyabr – bizim şanlı Qələbəmizin, Zəfərimizin Günüdür” adlı, Ali Baş Komandan İlham Əliyevin tarixi çıxışlarını əks etdirən videoçarx nümayiş etdirilib.
Tədbiri giriş sözü ilə açan tanınmış hərbi jurnalist Abdulla Qurbani Zəfər Bayrağının fəxri qarovulun müşayiəti ilə salona gətirildiyini elan edib.
Ulu Öndər Heydər Əliyevin və şəhidlik zirvəsinə ucalan vətən övladlarının xatirəsi bir dəqiqəlik sükutla yad edildikdən sonra Dövlət Himni səsləndirilib.
Tədbirdə çıxış edən Nəsimi Rayon İcra Hakimiyyəti başçısının səlahiyyətlərini icra edən, başçının müavini Zahid Xəlilov Zəfər tarixinin əhəmiyyətindən bəhs edərək bildirib ki, bu gün Prezident İlham Əliyevin rəhbərliyi ilə tarixinin ən şərəfli dövrünü yaşayır. Ali Baş Komandanın qətiyyətli iradəsi və müdrik siyasəti nəticəsində Azərbaycan Ordusu işğal altında olan torpaqlarımızı azad edərək misilsiz qəhrəmanlıq salnaməsi yazıb.
Natiq çıxışına davam edərək qeyd edib ki, 44 günlük Vətən müharibəsi müstəqil Azərbaycanın tarixinə qızıl hərflərlə yazılmış şanlı Zəfər salnaməsidir. Bu Zəfərin qəhrəmanları olan şəhidlərimizin ailələrinə və qazilərimizə Nəsimi rayonunda daim yüksək həssaslıqla yanaşılır.
Xüsusi vurğulanıb ki, Prezident İlham Əliyevin rəhbərliyi altında şanlı tariximizə hələ neçə-neçə zəfər dolu səhifələr yazılacaqdır. Onun əldə etdiyi razılaşmalara uyğun olaraq reallaşacaq Zəngəzur dəhlizi qitələri birləşdirən mühüm nəqliyyat bağlantısına çevriləcəkdir.
Tədbir boyu səsləndirilən “Vətən, sənin şəhidlərin” elegiyası və digər bədii kompozisiyalar iştirakçılarda dərin duyğular yaşadıb.
Sonda “Müzəffər ordumuz” mahnısının sədaları altında iştirakçılar xatirə şəkilləri çəkdirib. Tədbir bir daha bütün xalqımızın Zəfər ruhunu, Ali Baş Komandana inamını və Vətənə sevgisini nümayiş etdirib.
Tədbirin sonunda şəhidlərin ailə üzvlərinə xatirə hədiyyələr təqdim edilib.
