Elektron və kağız kitablar arasında rəqabət olduğu barədə fikirlər son illər tez-tez səsləndirilir. Lakin bu yanaşma reallığı tam əks etdirmir. Məsələ formaların toqquşmasında deyil, oxu imkanlarının genişlənməsindədir.
Mövzu ilə bağlı Alyans.media – ya açıqlama verən Qanun nəşrlər evinin sahibi Şahbaz Xuduoğlu bildirir ki, “Elektron və kağız kitablar bir-birini əvəz etmir, əksinə, bir-birini tamamlayaraq oxucu üçün daha geniş seçim imkanları yaradır”.
“Elektron kitabla kağız kitabı qarşı-qarşıya qoymaq doğru yanaşma deyil. Elektronu elektron kimi, kağızı isə kağız kimi qəbul etmək lazımdır. Bu iki format bir-birinin sahəsini daraltmır, əksinə, bir-birini tamamlayır və genişləndirir. Elektron kitabların yayılması kağız kitabın bazarını sıradan çıxarmayıb – əksinə, kağız kitab yenə öz formasında satılır, elektron kitab da öz auditoriyasını tapır.
Reallıq ondan ibarətdir ki, oxucu artıq hər iki formatdan paralel şəkildə istifadə edir. İnsan həm elektron oxuyur, həm də kağız kitab oxuyur. Məsələn, elektron cihazın şarjı bitəndə oxucu kağız kitaba yönəlir. Mənim öz çantamda da daim 3-4 kitab olur. Amma eyni zamanda elektron kitabdan da istifadə edirəm – əgər yanımda kağız kitab yoxdursa.
Bu, sadəcə yeni dövrün reallığıdır – yeni trendlər, yeni sahələr formalaşır. Bu sahələr bir-birini inkar etmir, bir-birindən doğur və inkişaf edir. Yəni, elektron və kağız kitab bir-birinin yerini tutmur, əksinə, bir-birinin imkanlarını genişləndirir. Məncə, burada hər hansı rəqabətdən yox, qarşılıqlı tamamlanmadan danışmaq daha doğrudur.”
Ülkər Rəhmanqızı
