Ukraynanın Dnepropetrovsk və Zaporojye bölgələrindəki müəyyən yaşayış məntəqələrindən əhali məcburi təxliyə edilir.
Alyans.media xəbər verir ki, bu barədə Ukrayna İcmalar və Ərazilərin İnkişafı Nazirliyi məlumat yayıb.
Qərarın icmalar və ərazilərin inkişafı nazirinin müavini Aleksey Ryabikin sədrliyi ilə keçirilən Təxliyə Tədbirləri üzrə Koordinasiya Qərargahının iclasından sonra qəbul edildiyi bildirilir.
Bəyanatda məcburi təxliyənin elan edildiyi yaşayış məntəqələrinin siyahısı verilməyib. Bundan əlavə, təmas xəttindən təxminən 50 km məsafədə yerləşən Zaporojye bölgəsindəki sakinlərin təxliyəsi barədə qərar qəbul edilib. Təxliyə tədbirləri təhlükəsizlik tələbləri, tibbi göstərişlər və zəruri müşayiətçilər nəzərə alınmaqla həyata keçiriləcək.
Görüş zamanı təxliyə edilən vətəndaşlar üçün tranzit mərkəzlərinin fəaliyyəti və Xarkov bölgəsində əlavə bir mərkəzin açılması ehtimalı da müzakirə edilib. Nazirlik bildirir ki, 2025-ci il 1 iyundan bəri Ukraynanın cəbhə bölgələrindən təxminən 124 min insan, o cümlədən 14 min 500-dən çox uşaq və 4 mindən çox hərəkət qabiliyyəti məhdud olan insan daha təhlükəsiz ərazilərə təxliyə edilib.
