Ümummilli Lider Heydər Əlirza oğlu Əliyev 10 may 1923-cü ildə Naxçıvan şəhərində dünyaya gəlib. Əməksevər bir ailədə böyüyən Heydər Əliyev erkən yaşlarından elmə, intizama və çalışqanlığa xüsusi maraq göstərib. Orta təhsilini Naxçıvanda başa vuran Ulu Öndər 1941-ci ildə Azərbaycan Sənaye İnstitutunun memarlıq fakültəsinə daxil olub. Müharibə şəraiti onun təhsilini davam etdirməsinə imkan verməsə də, o, gənc yaşlarından dövlətçilik və təhlükəsizlik işlərinə maraq göstərərək 1944-cü ildən Bakı Şəhər Dövlət Təhlükəsizliyi İdarəsində çalışmağa başlayıb. Analitik düşüncəsi, peşəkarlığı və yüksək idarəçilik qabiliyyəti sayəsində qısa müddətdə yüksək vəzifələrə yüksələn Heydər Əliyev 1950–1952-ci illərdə Leninqrad Dövlət Təhlükəsizlik Komitəsinin Ali Məktəbində xüsusi təhsil alaraq peşəkar hazırlığını daha da möhkəmləndirib.
1969-cu ildə Heydər Əliyev Azərbaycan Kommunist Partiyası Mərkəzi Komitəsinin birinci katibi seçilərək respublikanın rəhbəri oldu və onun dönəmində Azərbaycan iqtisadi, sosial və mədəni inkişaf baxımından yeni mərhələyə qədəm qoydu. Müstəqilliyin ilk illərində ölkənin üzləşdiyi ağır siyasi böhran və parçalanma təhlükəsi fonunda 1993-cü ildə xalqın tələbi ilə yenidən hakimiyyətə qayıdan Heydər Əliyev Azərbaycan dövlətçiliyini məhv olmaqdan xilas etdi, sabitlik və inkişaf strategiyasını müəyyənləşdirdi. Onun rəhbərliyi illərində hüquqi dövlət quruculuğu, ordu quruculuğu, iqtisadi islahatlar və beynəlxalq əlaqələrin gücləndirilməsi sahəsində mühüm addımlar atıldı, Azərbaycan dünya siyasətində etibarlı tərəfdaş kimi tanındı.
Dövlət və xalq qarşısındakı misilsiz xidmətlərinə görə Heydər Əliyev iki dəfə Sosialist Əməyi Qəhrəmanı adına layiq görülüb, müxtəlif ölkələrin ali orden və mükafatları ilə təltif edilib. Onun zəngin irsi, dövlətçilik fəlsəfəsi və Azərbaycanın inkişaf yolunu müəyyən edən strateji baxışları bu gün də müstəqil Azərbaycanın tərəqqisində əsas istiqamət olaraq qalmaqdadır. Ulu Öndərin anım günü ölkənin hər yerində dərin ehtiramla qeyd edilir, onun xatirəsi isə xalqın yaddaşında əbədi yaşayır.
