Moda daim dəyişir və hər mövsüm fərdi stilini ifadə etmək istəyənlər üçün yeni imkanlar açır.
2026-cı ilin qışı isə təbii tonlar, düzgün kombinasiyalar və zərif aksessuarlarla fərqlənəcək. Bu mövsüm geyim yalnız funksional deyil, həm də vizual olaraq eleqant və bahalı görünməlidir.
Bu fikirləri Alyans.media – ya modelyer Şəlalə Maqsudova bildirib.
Modelyer onu da əlavə edib ki, 2026-cı ilin qış mövsümündə yaşılın müxtəlif tonları — kivi rəngi, zeytuni və soyuq yaşıl çalarları, zoğalı, qəhvəyi və ümumən tünd tonlar ön planda olacaq. Tünd şokolad və kül rəngi də qışın seçilən rəngləri sırasındadır. Klassik ağ və qara isə hər zaman olduğu kimi aktual qalır.
Şəlalə xanım vurğulayıb ki, mövsümə uyğun rənglərin düzgün kombinasiyası geyimi daha bahalı və eleqant göstərir. Xüsusilə tünd şokolad rəngi ağ, qırıq ağ və mavi tonlarla birləşdikdə obraz daha zərif görünür.
Modelyerin fikrincə yalnız dəb deyil, rahatlıq və komfort əsas rol oynayır. Düzgün biçimli geyimlər həm dəbə uyğun olmalı, həm də insan üzərində özünü daşımalıdır.
Parça seçimlərinə gəldikdə, bu qış yun tərkibli materiallar, tvit parçalar, cins və dəri materialları, eləcə də süni xəzlər daha çox istifadə olunacaq. Bununla yanaşı, təbii parçalar — xüsusilə kətan qarışıqlı materiallar da trend olaraq qalacaq.
Aksessuarlar isə geyimin tamamlayıcı elementi sayılır. Şəlalə xanım bildirib ki, çanta, şərf və bijuteriyaların düzgün seçimi ümumi obrazı tamamlayır. 2026-cı ilin qışında isə kiçik ölçülü çantalar daha çox trend olacaq.
Ülkər Rəhmanqızı
