Azərbaycan dili bizim milli kimliyimizin əsas dayağı, düşüncə və ifadə vasitəmizdir. Onun qorunması və zənginləşdirilməsi hər bir vətəndaşın mənəvi borcudur. Son dövrlərdə Azərbaycan dilinin tətbiqi ilə bağlı pozuntulara qarşı cərimələrin tətbiqi məsələsi cəmiyyətdə geniş müzakirələrə səbəb olub. Tanınmış dilçi alim, professor, Qulu Məhərrəmli bu məsələ ilə bağlı Alyans.media – ilə fikirlərini bölüşərək bildirib ki, dilin qorunması təkcə inzibati yollarla deyil, daha çox sevgi, maarifləndirmə və dilə olan münasibətlə mümkün ola bilər.
Onun sözlərinə görə, dövlət dili olan Azərbaycan dilinin qorunması və inkişafı hər bir vətəndaşın mənəvi borcudur. Əməkdar jurnalist qeyd edib ki, bu sahədə kifayət qədər qanunvericilik bazası, dövlət proqramları və normativ sənədlər mövcuddur. Lakin problem əsasən dil daşıyıcılarının – yəni vətəndaşların, media və reklam sahələrinin məsuliyyətsiz yanaşmasından qaynaqlanır.
“Şəhərdə hər yerdə dil pozuntuları var – reklam lövhələrində, elanlarda, müəssisə adlarında. Xarici sözlərin həddindən artıq istifadəsi, Azərbaycan əlifbasına və orfoqrafiyasına uyğun olmayan yazılar geniş yayılıb. Amma bütün bu problemlərin həlli inzibati cərimələrlə deyil, maarifləndirmə ilə olmalıdır,” – deyə professor vurğulayıb.
Qulu Məhərrəmli hesab edir ki, dilə münasibət qanunla deyil, sevgi ilə formalaşmalıdır: “Cərimə dili qorumağın effektiv yolu deyil. Əsas məsələ insanlarda ana dilinə sevgini, məsuliyyəti və marağı oyatmaqdır. Dilə hörmət, ilk növbədə, onu yaxşı bilməkdən və düzgün istifadə etməkdən keçir. Bu da təhsillə, mədəniyyətlə, maarifləndirmə ilə mümkündür”.
Televiziya tənqidçisi onu da qeyd edib ki, dilin inkişafı üçün oxumaq, mütaliə, ədəbiyyat və zəngin nitq mədəniyyəti vacib şərtlərdir: “Dil bir xalqın düşüncə tərzidir. Ona görə də Azərbaycan dili nəzarət yox, sevgi ilə qorunmalıdır”.
