“Dezinformasiyaya və saxta xəbərlərə qarşı mübarizə bu gün Azərbaycan mediası və xüsusilə sosial şəbəkələr üçün ən aktual məsələlərdən biridir”. Bu fikirləri Mətbuat Şurası İdarə Heyətinin üzvü Hacıbəy Heydərli mediada yayılan yanlış və manipulyativ məlumatlarla bağlı Alyans.media – ya açıqlamasında səsləndirib.
Onun sözlərinə görə, “Dezinformasiya problemi artıq təkcə Azərbaycanda deyil, dünyanın bütün ölkələrində geniş vüsət alıb. Bu tendensiyanın əsas səbəbləri sırasında sosial şəbəkələrin sürətli inkişafı və süni intellektin yaratdığı yeni imkanlar dayanır”.
Hacıbəy Heydərli qeyd edib ki, Azərbaycan mediasında da zaman-zaman fake news və dezinformasiya hallarına rast gəlinir:
“Bəzən insanların şərəf və ləyaqəti alçaldılır, qarşı tərəfin mövqeyi öyrənilmir, hətta xəbər mahiyyəti daşımayan hadisələr informasiya kimi təqdim olunur. Bu isə ciddi neqativ hallara yol açı. Mövcud problemlərə baxmayaraq, ümumilikdə Azərbaycan mediası dezinformasiyaya qarşı mübarizə aparmaq gücünə malikdir və bu sahədə hüquqi mexanizmlər mövcuddur. Belə ki, Cinayət Məcəlləsi və İnzibati Xətalar Məcəlləsinin müvafiq maddələri, eləcə də “İnformasiya, informasiyalaşdırma və informasiyanın mühafizəsi haqqında” qanun saxta məlumatların yayılmasını qadağan edir. Eyni zamanda sosial media platformaları bu istiqamətdə məsuliyyəti daha da artırmalı, dezinformasiya yayıldığı hallarda rəsmi qurumların açıqlamaları verilməli və qarşı tərəfin mövqeyi mütləq işıqlandırılmalıdır. Yeni yaranan saytlar müəyyən səhvlərə yol verə bilər. Amma bütövlükdə Azərbaycan mediası növbəti mərhələlərdə dezinformasiya və fake news-lara qarşı mübarizədə aparıcı rol oynayacaq və bu istiqamətdə sosial mediada nəzarəti daha da gücləndirəcək”, – deyə Hacıbəy bildirib.
