Cəmiyyətdə tatu və qaş çəkdirmək kimi estetik müdaxilələrin dini baxımdan haram olub-olmaması ilə bağlı müzakirələr genişlənib. Sosial şəbəkələrdə və ictimai müstəvidə bu mövzuda ziddiyyətli fikirlər səsləndirilir, bəzən isə şəxsi yanaşmalar dini hökm kimi təqdim olunur.
Məsələ ilə bağlı ilahiyyatçı Elşad Miri Alyans.media – ya açıqlama verərək Qurani-Kərimə əsaslanan mövqeyini bildirib.
İlahiyyatçının sözlərinə görə, “Tatu və qaş çəkdirmək kimi estetik yanaşmaların İslamda qəti şəkildə haram sayılması doğru deyil. İslamda haram və halal anlayışlarını müəyyən edən yeganə qüvvə Allahdır və Allahın insanlara göndərdiyi əsas, dəyişməz mənbə Qurani-Kərimdir. Quranda isə tatu, qaş çəkdirmək və bu tip estetik müdaxilələrlə bağlı açıq və konkret bir qadağa yer almır”.
Elşad Miri onu da qeyd edib ki, “Hər hansı bir məsələnin cəmiyyət tərəfindən bəyənilməməsi və ya kimlərinsə şəxsi zövqünə uyğun gəlməməsi onun dini baxımdan haram olduğu anlamına gəlmir. İslamda bir əməlin haram sayılması üçün açıq ilahi hökm olmalıdır. bir şeyin zərərli olması və ya sağlamlıq baxımından risk daşıması da onun avtomatik olaraq haram hökmü alması demək deyil. Bu cür məsələlər daha çox tibbi və fərdi məsuliyyət çərçivəsində dəyərləndirilməlidir. Din isə insanları düşünərək, ölçülü-biçili davranmağa çağırır”.
