Hazırda Türkiyənin Balıkəsir şəhərində yaşayan Azərbaycan vətəndaşı Aysutümay Koyun Azad İstehlakçılar Birliyinə şikayət ünvanlayaraq “Max Group” MMC-nin ona qarşı dələduzluq etdiyini bildirib.
Azad İstehlakçılar Birliyindən XALQ-a daxil olan məlumata görə, A.Koyun 17 aprel 2025-ci ildə “Max Group” MMC ilə xaricdə təhsil üçün müqavilə imzalayıb.
Müqaviləyə əsasən, “Max Group” MMC Aysutümay Koyuna İzmir Demokrasi Universitetinin “Fizyoterapi və Rehabilitasyon” ixtisası üzrə bakalavriat təhsil pilləsinə sənədləşmə işinin aparılması xidmətini göstərməlidir.
Şikayətçi bildirib ki, göstəriləcək xidmətlərin qarşılığında “Max Group” MMC-yə 6 800 manat məbləğində vəsait köçürüb. Lakin ödənişdən və müqavilədən sonra universitetdən ona heç bir rəsmi qəbul məktubu göndərilməyib.
A.Koyun iddia edib ki, şirkət nümayəndələri aylarla müxtəlif bəhanələrlə əlaqədən yayınaraq prosesi gecikdiriblər.
Şikayətçi iddia edir ki, şirkət öhdəliklərini yerinə yetirməyib və onu aldadıb. Balıkəsir sakini ödədiyi 6 800 manatın geri qaytarılmasını istəyir.
Məsələ ilə bağlı “Max Group” MMC ilə əlaqə saxlamağa çalışdıq. Şirkətin icraçı direktoru Fərqanə Nəbiyeva məsələ ilə bağlı açıqlama verəcəklərini bildirsə də, sonrakı zənglərimiz cavabsız qaldı.
Məlumat üçün bildirək ki, “Max Group” MMC 3 avqust 2017-ci ildə dövlət qeydiyyatına alınıb. Nizamnamə kapitalı 10 manat olan MMC-nin hüquqi ünvanı Səbail rayonu, Bünyad Sərdarov ev 23-də yerləşir. Şirkətin qanuni təmsilçisi Nəbiyev Elman Nəsib oğludur.
Onu da qeyd edək ki, hazırda “Max Group” MMC-nin dövlət büdcəsinə vaxtında ödənilməyən 7 046 manat 58 qəpik vergi borcu mövcuddur.
Qeyd edək ki, “Max Group” Təhsil Mərkəzinin icraçı direktoru Fərqanə Nəbiyevadır rəhbəri isə Elmin Nəbiyevdir
