ABŞ-İsrail və İran arasında gərginliyin genişlənməsi dünya enerji bazarına da təsir edib. Münaqişənin şiddətlənməsi fonunda neftin qiyməti artmağa davam edir.
Alyans.media xarici mətbuata istinadən xəbər verir ki, bazar ertəsi İranın İsrailə raket zərbələri endirməsi və regionda hərbi qarşıdurmanın genişlənməsi neft tədarükü ilə bağlı narahatlıqları artırıb. Eyni zamanda ABŞ Senatı Amerikanın İrana qarşı hava hücumlarını dayandırmağa yönəlmiş təşəbbüsü bloklayıb.
Analitiklərin fikrincə, Yaxın Şərqdə vəziyyətin gərginləşməsi enerji bazarında təchizat risklərini artırır. Xüsusilə də dünya neft ticarətinin əsas marşrutlarından biri sayılan Hörmüz boğazında gəmi hərəkətinin dayanması vəziyyəti daha da mürəkkəbləşdirib. Bir sıra böyük istehsalçılar hasilatı azaltmağa başlayıb, digərləri isə təchizat təhlükəsizliyini təmin etmək üçün əlavə tədbirlər görür.
Son məlumatlara görə, “Brent” markalı neftin qiyməti 2.35 dollar və ya 2.9% artaraq bir barel üçün 83.75 dollara yüksəlib. ABŞ-ın WTI markalı nefti isə 2.42 dollar və ya 3.2% bahalaşaraq 77.08 dollar səviyyəsinə çatıb.
Sevinc Yarməmmədova
