Xəbər verdiyimiz kimi, külli miqdarda ziyan vurmaqla dələduzluq etməkdə təqsirləndirilən müğənni Rəqsanə İsmayılova barəsində qətimkan tədbiri dəyişdirilib. Onun barəsində olan ev dustaqlığı qətimkan tədbiri polis nəzarəti altında olma qətimkan tədbiri ilə əvəz olunub.
Alyans.media-nın məlumatına görə vəkil Babək Həmidov AZXEBER.COM-a açıqlamasında deyib ki, qətimkan tədbirlərinin bir neçə növü var:
“Azərbaycan Respublikasının Cinayət Prosessual Məcəlləsi qətimkan tədbirlərinin bir neçə növünü müəyyən edir. Bunlar həbs, ev dustaqlığı, girov, zaminlik və polis nəzarətinə vermə kimi qətimkan tədbirləridir. Ən ağır qətimkan tədbiri həbs hesab olunur, daha sonra ev dustaqlığı gəlir. Şəxsin bu qətimkan tədbiri müddətindəki davranışı nəzərə alınaraq, ibtidai istintaqı aparan orqan tərəfindən onun barəsində polis nəzarətinə vermə qətimkan tədbiri seçilə və ya bu tədbir məhkəmə tərəfindən tətbiq oluna bilər”.
O bildirib ki, bu qərarın qüvvədə olduğu müddətdə şəxs yaşayış ünvanını dəyişə bilməz:
“Polis nəzarətinə vermə qətimkan tədbiri Cinayət Prosessual Məcəlləsinin 169-cu maddəsi ilə tənzimlənir. Həmin maddəyə əsasən, bu tədbir seçildikdə dərhal bu barədə məlumat şəxsin daimi yaşayış yeri üzrə polis orqanına göndərilir və şəxs 24 saat ərzində dəvət edilərək qərarla tanış edilir. Qərarın qüvvədə olduğu müddətdə, yəni ibtidai istintaq və ya məhkəmə istintaqı dövründə şəxs istənilən vaxt polis orqanına çağırıla bilər. Şəxsin daimi yaşayış yeri və ya müvəqqəti olduğu yer polis orqanının razılığı olmadan dəyişdirilə bilməz. Eyni zamanda, polis orqanına məlumat vermədən yaşayış məntəqəsini və ya şəhəri tərk etmək də qadağandır”.
“Bu öhdəliklər pozulduğu halda, şəxs barəsində istintaqdan yayınma halları araşdırıla və daha ağır qətimkan tədbiri seçilə bilər”,-deyə vəkil qeyd edib.
Qeyd edək ki, müğənni Rəqsanə İsmayılova ötən ilin avqust ayında dələduzluq ittihamı ilə həbs edilib.
