Azərbaycan Dövlət Akademik Milli Dram Teatrında BMT-nin Ümumdünya Şəhərsalma Forumunun On Üçüncü Sessiyası (WUF13) günlərində bir sıra maraqlı tamaşalar nümayiş olunacaq. Teatrın repertuarında yer alan səhnə əsərləri forum iştirakçıları, şəhər qonaqları və turistlər üçün Azərbaycanın zəngin mədəniyyətini, teatr ənənələrini və səhnə sənətini daha yaxından tanımaq üçün maraqlı imkan yaradacaq.
Alyans.media xəbər verir ki, bunu AZƏRTAC-a açıqlamasında teatrın mətbuat katibi Aygün Süleymanova söyləyib.
“İnanırıq ki, paytaxtda keçirilən beynəlxalq tədbir müddətində teatr proqramı Bakıya gələn qonaqların asudə vaxtının daha rəngarəng və yaddaqalan keçməsinə töhfə verəcək”, – deyə o bildirib.
Onun sözlərinə görə, WUF13 çərçivəsində dahi dramaturq Hüseyn Cavidin “İblis” faciəsinin motivləri əsasında hazırlanan “İblis və”, həmçinin Xalq yazıçısı Anarın “Dantenin yubileyi” əsəri əsasında eyniadlı tamaşalar subtitrlər vasitəsilə ingilis dilinə tərcümə edilərək xarici qonaqlar üçün daha əlçatan olacaq.
Nümayiş olunacaq tamaşalar barədə ətraflı məlumat verən A.Süleymanova deyib: “İblis və” tamaşasının quruluşçu rejissoru Dövlət mükafatı laureatı, Əməkdar incəsənət xadimi Mehriban Ələkbərzadə, quruluşçu rəssamı Əməkdar mədəniyyət işçisi İlham Əsgərov, geyim üzrə rəssamı Vüsal Rəhim, işıq üzrə rəssamı Rafael Həsənov, bəstəkarı Azər Hacıəsgərli, məsləhətçisi Əməkdar mədəniyyət işçisi Azər Turan, rejissor assistentləri Nərmin Həsənova və Ceyran Başarandır. “Dantenin yubileyi”nin quruluşçu rejissoru Sankt-Peterburqda yaşayan azərbaycanlı rejissor Ərşad Ələkbərov, musiqi tərtibatçısı Ayat Baxşıyev, rejissor assistentləri Dilbər İsmayılova və Vüqar Məmmədovdur”.
