Gəncə terrorunda valideynlərini itirən Sevil Əliyeva ana olub.
Alyans.media xəbər verir ki, bu barədə “Təsir dairəsi” verilişində aparıcı Lalə Azərtaş məlumat verib.Eyni zamanda o görüntüləri sosial şəbəkə hesabında paylaşıb.
O bildirib ki, Talış adlı bəylə ailəli olan Sevilin oğlu dünyaya gəlib və körpəyə Rəşad adını veriblər:
“Bu, bizim üçün ən gözəl Zəfər bayramı hədiyyəsi oldu. Çünki biz bir ölüb, min dirilirik. Bizim soyumuz, kökümüz davam edir. Sevillə xəstəxanada əməliyyata girənə qədər danışdım. Əslində mən bu gün rayona çıxmalı idim, uşaq səhər, Zəfər Günündə dünyaya gəlməli idi. Sadəcə balam dedi ki, Zəfəri elə ilk saniyələrdən sizinlə qarşılayaram”.
Qeyd edək ki, terror hadisəsi yaşanan gecə dağıntılar altında qalan Sevil açıqlamalarından birində onu sinif yoldaşının xilas etdiyini bildirmişdi. Sevilin ailə qurduğu gənc onu dağıntılar altından çıxaran həmin sinif yoldaşıdır. Cütlük ötən ilin yanvarında ailə qurub.
