Orta yaşda tez-tez yüksək emal olunmuş qidaları istehlak edən qadınlar yaşlandıqca yaddaş və düşüncə qabiliyyətində daha çox çətinliklərlə üzləşirlər.
Alyans.media bu barədə xarici mediata istinadən xəbər verir. Nyu-York Universitetinin tədqiqatçıları bu nəticəyə gəlib. Araşdırmanın nəticələri Preventive Medicine jurnalında nəşr olunub.
Qeyd olunub ki, yüksək emal olunmuş qidalar — şirniyyatlar, fast food, qazlı içkilər və hazır yeməklər — əlavə yağlar, şəkər, duz və süni dadlandırıcılarla zəngindir.
“Women’s Health Study” adlı uzunmüddətli tədqiqatda iştirak edən 5 mindən çox qadının məlumatları göstərib ki, 35–65 yaş aralığında bu cür məhsulları daha çox istehlak edən qadınlar 25–35 il sonra yaddaş və diqqət problemləri ilə bağlı şikayətlərini 20–24% daha yüksək nisbətdə bildiriblər.
Koqnitiv şikayətlər dedikdə yaddaşın zəifləməsi və diqqəti toplamaqda çətinlik çəkmək kimi subyektiv hisslər nəzərdə tutulur. Əvvəlki tədqiqatlar göstərib ki, bu cür əlamətlər demensiyanın başlanğıcından bir neçə il əvvəl görünə bilər.
Ən güclü əlaqə emal olunmuş süd və ət məhsulları ilə müşahidə olunub, şirniyyatlar və souslarla isə statistik əhəmiyyətli bir əlaqə aşkarlanmayıb.
Qadınlar Alzheimer xəstələrinin təxminən iki üçünü təşkil edir. Risk faktorlarının erkən mərhələdə müəyyənləşdirilməsi səhiyyə üçün prioritet hesab olunur. Yeni araşdırma göstərir ki, orta yaşda düzgün qidalanma beyin sağlamlığına onilliklər sonra da təsir edə bilər.
Müəlliflər vurğulayıblar ki, bu cür yüksək emal olunmuş qidaların azaldılması yaşla bağlı koqnitiv pozuntuların riskini azaltmaq üçün sadə və əlçatan bir yanaşma ola bilər.
Sevinc Yarməmmədova
