Son dövrlər Bakıda həyata keçirilən nəqliyyat islahatları vəziyyəti yaxşılaşdırmaq əvəzinə, əksinə, şəhərdə tıxacların sayını və davametmə müddətini artırıb, sürücülər və piyadalar üçün əlavə çətinliklər yaradıb.
Bu fikirləri Hüquqi və Demokratik İslahatlar Mərkəzinin sədr müavini Elçin Bayramlı Alyans.media – ya açıqlamasında bildirib.
Elçin Bayramlının sözlərinə görə, Bakının əksər küçələri dar olmaqla 1–2, maksimum 3 hərəkət zolağından ibarətdir. Bu zolaqlardan birinin avtobus, digərinin isə velosiped zolağına ayrılması nəticəsində ortada cəmi bir zolaq qalır və həmin zolaqda ciddi tıxaclar yaranır:
“Avtobus zolağından 15–20 dəqiqədən bir avtobus keçir, amma digər zolaqlarda saatlarla tıxac olur. Zolaq boş qalır, insanlar isə əziyyət çəkir. Bu, nəqliyyatın təşkili deyil, vəziyyəti daha da ağırlaşdırmaqdır. Bizdə taksilərin ictimai nəqliyyat zolağına buraxılmaması üçün ciddi və əsaslandırılmış səbəb yoxdur. Taksilərin sayı artıq azaldılıb, hamısı lisenziyalıdır və nəzarət altındadır. Zolağın boş qalmasındansa, taksilərin ora buraxılması ümumi gərginliyi azalda bilər.”
Elçin Bayramlı əlavə edib ki, hazırkı vəziyyətdə Bakıda avtomobili saxlayıb sərnişin endirib-düşürmək belə demək olar ki, mümkünsüz hala gəlib:
“Taksilər sağ zolaqlara girə bilmir, sərnişinləri yolun ortasında düşürməyə məcbur qalırlar. Bu isə birbaşa insanların həyatını təhlükə altına atır. Dünyanın heç bir normal şəhərində sərnişin yolun ortasında düşürülmür.”
Onun fikrincə, həm taksilərə ictimai nəqliyyat zolaqlarından istifadə imkanı verilməli, həm də adi avtomobillərə yol kənarında qısa müddətə sərnişin endirib-düşürməyə görə cərimə tətbiq edilməməlidir.
Ekspert pullu dayanacaqların da plansız şəkildə tətbiq olunduğunu vurğulayıb:
“Üç zolaqlı küçədə sağ və sol tərəfi pullu dayanacaq edib, ortada bir zolaq saxlayıblar. Bir avtomobil xarab olsa, bütün küçə iflic olur. Bakı demək olar ki, dünyada hər yerin pullu dayanacaq olduğu yeganə şəhərə çevrilib.”
Elçin Bayramlı hesab edir ki, mövcud “islahatlar” tıxacları azaltmır, əksinə artırır, ekologiyaya zərər vurur, insanların vaxtını və əsəblərini məhv edir:
“Bu islahat deyil. Bu, Bakı şəhərinin nəqliyyat sisteminin yanlış eksperimentlərlə iflic edilməsidir. Dünya təcrübəsinə baxılmalı və tamamilə əks istiqamətdə, məntiqli və təhlükəsiz bir sistem qurulmalıdır”.
Ülkər Rəhmanqızı
