Tehranda bir neçə ali təhsil müəssisəsində tələbə aksiyaları keçirilib.
Alyans.media xəbər verir ki, aksiyalar toqquşmalarla müşayiət olunub.
Tələbə birliyinin məlumatına görə, Tehrandakı Şəhid Beheşti Universitetinin Psixologiya və Pedaqoji Elmlər fakültəsinin tələbələri yanvar etirazları zamanı həyatını itirənlərin xatirəsinə və saxlanılan tələbələrə dəstək məqsədilə oturaq aksiya təşkil ediblər.
Amirkəbir Texnologiya Universitetinin tələbələri isə etirazdan sonra kampus yaxınlığında yolu bağlayıblar. Sosial şəbəkələrdə yayılan görüntülərdə onların “Qorxmayın, biz birlikdəyik!” şüarı səsləndirdiyi görünür. Həmin universitetdə yeni semestrin başlanğıcına həsr olunmuş toplantı zamanı bəzi iştirakçıların “Yaşasın şah!” şüarı səsləndirdiyi bildirilir.
Məşhəd Tibb Elmləri Universitetində də tələbələr aksiya keçirərək “Azadlıq!” şüarı səsləndiriblər.
Şərif Texnologiya Universitetində keçirilən etiraz isə qarşıdurmaya çevrilib. Məlumatlara görə, “Bəsic” könüllü qüvvələrinin üzvləri ilə tələbələr arasında gərginlik yaşanıb. Yayılan videolarda etirazçıların “Utanc!” və “Xameneyiyə ölüm!” kimi şüarlar səsləndirdiyi eşidilir.
Hadisələrlə bağlı rəsmi qurumların açıqlaması hələlik yayımlanmayıb.
