Dünyanın nüfuzlu nəşrlərindən olan “Bloomberg” agentliyi İranın neft tankerlərinin maneəsiz hərəkətini ABŞ Prezidenti Donald Trampın xarici siyasətinin iflası kimi qiymətləndirən geniş təhlil yayımlayıb.
Alyans.media xəbər verir ki, agentlik Tehrandan yük dolu tankerlərin sərbəst çıxışının ABŞ-ın İranın neft ixracını bloklamaq səylərinin nə dərəcədə səmərəsiz və məhdud olduğunu nümayiş etdirdiyini vurğulayıb.
Donald Trampın əvvəllər bu sanksiya siyasətini “böyük uğur” adlandırmasına baxmayaraq, reallıq Vaşinqtonun gözləntiləri ilə ziddiyyət təşkil edir. Məqalədə qeyd olunur ki, ağır iqtisadi böhran və davam edən hərbi əməliyyatlara rəğmən, İrandakı siyasi rejim hələ də ciddi dayanıqlılıq və dözümlülük nümayiş etdirməkdədir.
Ekspertlərin fikrincə, neft daşımalarının davam etməsi İranın həm daxili iqtisadiyyatını ayaqda saxlamasına, həm də regional siyasətdəki iddialarını qorumasına şərait yaradır.
Bu vəziyyət Ağ Evin İran üzərindəki “maksimum təzyiq” strategiyasının effektivliyini ciddi sual altına qoyur.
