Son həftələrdə ölkədə kəskin respirator virus infeksiyalarının yayılması müşahidə olunur. Məsələ ilə bağlı Alyans Media – ya danışan həkim ekspert Aydın Əliyev bildirib ki, bu virusların dəqiq törədicisi barədə rəsmi açıqlama verilməsə də, Səhiyyə Nazirliyinin baş infeksionisti kəskin respirator virus infeksiyalarının artdığını təsdiqləyib.
“Bu viruslar əsasən influenzaya aiddir və çoxsaylı alt növlərə malikdir. Hazırda yayılan infeksiya hava-damcı yolu ilə ötürülür və əsasən yuxarı tənəffüs yollarını zədələyir. Ən çox məktəblər, iş yerləri və sıx insan toplaşan məkanlarda yayılır”, – deyə həkim bildirib.
Aydın Əliyev əlavə edib ki, bu dəfəki infeksiya dalğası əvvəlki illərlə müqayisədə daha ağır keçir və uşaqlarda pnevmoniya hallarının artmasına səbəb olub.
“3-5 gündən artıq davam edən hərarət, halsızlıq, öskürək və digər əlamətlər varsa, mütləq həkimə müraciət edilməlidir. Əks halda, bu, ağırlaşmalara – o cümlədən pnevmoniyaya – gətirib çıxara bilər”, – o bildirib.
əlavə edib ki, artıq bəzi uşaqlarda xəstəlik reanimasiya səviyyəsinə qədər ağırlaşıb. Buna görə də valideynlərə və müəllimlərə çağırış olunur ki, xəstə uşaqlar təcili tibbi yardım almalı və sağlam uşaqlardan izolyasiya edilməlidir.
“Bu vəziyyət karantin tədbirlərini tələb etmir. Sadəcə olaraq maarifləndirmə aparılmalı, yoluxmuş şəxslər məsuliyyətli davranaraq cəmiyyətə çıxmamalı, həkimə müraciət edib qeydiyyata düşməlidirlər”, – deyə həkim vurğulayıb.
Aydın Əliyev sonda qeyd edib ki, bu tip viruslar hər il yayılsa da, bu ilki hallarda ağırlaşmalar daha çox müşahidə olunur və müalicə vaxtında aparılarsa, narahatlığa əsas yoxdur.
“Hər kəsə keçmiş olsun!” – deyə o, vətəndaşlara sağlamlıq arzulayıb.
