2026-cı ilin Azərbaycanda “Şəhərsalma və Memarlıq İli” elan olunması ölkənin müasir inkişaf mərhələsində strateji addım kimi qiymətləndirilir. Milli Məclisin deputatı Vüqar İskəndərov Alyans.media -ya açıqlamasında bu qərarın əhəmiyyətindən danışıb.
Deputat bildirib ki, Prezident İlham Əliyevin müvafiq Sərəncamı təkcə memarlıq sahəsinin deyil, ümumilikdə Azərbaycanın gələcək vizionunun bir hissəsidir:
“Bu il Azərbaycanın şəhərsalma siyasətində yeni mərhələnin başlanğıcıdır. İşğaldan azad edilən ərazilərdə aparılan genişmiqyaslı quruculuq və bərpa işləri məhz müasir şəhərsalma yanaşmasına əsaslanır. Ənənə və innovasiyanın vəhdəti, xalqımızın tarixi yaddaşını əks etdirən memarlıq nümunələrinin qorunması və yenidən dirçəldilməsi əsas prioritetlərdəndir.”
Vüqar İskəndərov həmçinin qeyd edib ki, “Ağıllı kənd” və “Ağıllı şəhər” konsepsiyalarının tətbiqi, ekoloji baxımdan dayanıqlı yaşayış məkanlarının yaradılması və müasir infrastrukturun qurulması, Azərbaycanın gələcəyinə edilən ciddi bir sərmayədir.
“Şəhərsalma və Memarlıq İli” təkcə texniki və infrastruktur layihələri əhatə etmir. Bu həm də milli kimliyimizin, mədəni irsimizin və şəhər mədəniyyətinin inkişafına yönəlmiş genişmiqyaslı ideoloji platformadır. Bu baxımdan bütün müvafiq qurumlar və ictimaiyyət bu prosesi dəstəkləməli, ona töhfə verməlidir,” – deyə deputat fikrini tamamlayıb.
Xatırladaq ki, 2026-cı il Prezident İlham Əliyevin Sərəncamı ilə ölkəmizdə “Şəhərsalma və Memarlıq İli” elan edilib. Məqsəd Azərbaycanın müasir memarlıq mühitini inkişaf etdirmək, şəhərsalma sahəsində qabaqcıl təcrübələri tətbiq etmək və milli memarlıq dəyərlərini gələcək nəsillərə ötürməkdir.
