Son günlərdə Cefri Epşteynə aid sənədlərin açılması ilə əlaqədar sosial mediada müxtəlif iddialar yayıldı. Xüsusilə diqqət çəkən mövzulardan biri, Epşteynin yazışmalarında III Dünya Müharibəsi ilə bağlı danışdığı və tarix olaraq 8 Fevral 2026-nın göstərildiyi iddiasıdır.
Alyans.media Crossmedia.az-a istinadən xəbər verir. Lakin aparılan təhlillər göstərir ki, bu məlumatlar düzgün deyil və faktlarla təsdiqlənmir. ABŞ Ədliyyə Nazirliyi Epşteyn haqqında milyonlarla sənədi ictimaiyyətə açıqladıqdan sonra bu sənədlərdən əldə edilən məlumatların bir hissəsi yanlışdır. İddia edilən yazışmalarda “investementt opp” ifadəsi istifadə edildiyi bildirilir, lakin burada açıq yazım səhvi mövcuddur və bu ifadə heç bir sənəddə əslində yer almır.
Qeyd edək ki, yalnız bir yazışmada, adının gizli saxlanıldığı bir şəxsin Epşteynə “III Dünya Müharibəsinin başlanğıcı?” sualını verdiyi görünür.
Digər yazışmalarda “Rachael Haynes” adlı köməkçi ilə əlaqəli mesajlar mövcuddur, lakin bu yazışmalarda 2026 Fevral və III Dünya Müharibəsi ilə bağlı heç bir qeyd yoxdur. E-poçtda “James Heywood” adlı şəxs Epşteynə uyğun olmadığını bildirir və əlaqə üçün köməkçisi Rachael Haynes ilə danışmağı tövsiyə edir.
Bu iddiaların doğru olmadığını təsdiqləmək üçün həm manual axtarışlar, həm də süni zəka dəstəyi ilə işləyən “Sourcebase.ai” alətindən istifadə edilib. Nəticələr göstərir ki, belə bir yazışma sənədlərdə yoxdur və iddia vizualının dijital müdaxilə ilə yaradıldığı ehtimal olunur.
Yekun olaraq, Epşteyn sənədlərində yayılan “8 Fevral 2026 tarixində III Dünya Müharibəsi baş verəcək” iddiası yanlış, faktlara əsaslanmayan və manipulyasiya məqsədli məlumatdır. Və bütün bu açılan sənədlər və yayılan məlumatlar fonunda insanın ağlına bir sual gəlir: niyə bütün bu gizli yazışmalar, planlar və iddialar vaxtında ortaya çıxmayıb, niyə indi, illərlə gizli saxlanıldıqdan sonra ictimaiyyətə təqdim olunur və bunun arxasında hansı həqiqətlər, hansı ört-basdır edilən hədlər və hansı maraqlar durur – və tam olaraq bu səbəblər insanların beynində şübhə və narahatlıq yaradır.
