Göygöldə baş verən hadisə ilə əlaqədar AQTA-nın Gəncə-Daşkəsən Regional Bölməsi tərəfindən rayonun Aşıqlı kənd məktəbinin daxilində fəaliyyət göstərən bufetdə plandankənar yoxlama keçirilib.
Bu barədə Alyans.media-ya AQTA-dan məlumat verilib.
Bildirilir ki, satılan məhsullardan laborator müayinələr üçün nümunələr götürülüb.
“Bufetin fəaliyyəti müvəqqəti olaraq dayandırılıb”, – qurumdan qeyd olunub.
Xatırladaq ki, fevralın 17-də AQTA Göygöl rayonu Aşıqlı kənd tam orta məktəbində 10 şagirdin zəhərlənmə şübhəsi ilə Göygöl Rayon Mərkəzi Xəstəxanasına müraciət olunduğunu vurğulayıb. Bildirilir ki, şagirdlərə ilkin tibbi yardım göstərilib, dəqiqləşdirilməmiş qeyri-infeksion qastroenterit diaqnozu qoyulub:
“Faktla bağlı Qida Təhlükəsizliyi Agentliyi tərəfindən araşdırmalara başlanılıb. Nümunələr götürülərək müayinələrə cəlb olunub. İctimaiyyətə əlavə məlumat veriləcək”.
Xatırladaq ki, dünən saat 13:00 radələrində Göygöl rayonu ərazisində zəhərlənmə şübhəsilə 10 nəfər (7 kişi, 3 qadın) yeniyetmə Göygöl Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
Onlara digər dəqiqləşdirilməmiş qeyri-infeksion qastroenteritlər və kolitlər diaqnozu təyin olunub və zəruri tibbi yardım göstərilib. Vəziyyətləri qənaətbəxş qiymətləndirilən şəxslərin hər biri ambulator müalicə üçün evə buraxılıb.
