İnzibati Xətalar Məcəlləsinə edilən son dəyişikliklərə əsasən, Azərbaycanda elektron siqaretlərin istifadəsi ilə bağlı məhdudiyyətlər daha da sərtləşdirilir. Yeni qaydalara görə, 2026-cı il aprelin 1-dən etibarən Bakı metropoliteninin stansiyalarında və qatarlarda elektron siqaretlərdən istifadə qadağan olunacaq.
Alyans.media xəbər verir ki, dəyişikliklər ictimai yerlərdə tütün və tütün məhsullarının istifadəsinin məhdudlaşdırılması ilə bağlı qanunvericiliyin tələblərinin daha effektiv icrasını təmin etmək məqsədi daşıyır. Qadağa metro stansiyalarını, platformaları, keçidləri və qatarların daxilini əhatə edəcək.
Qanunvericiliyə əlavə edilən yeni maddəyə əsasən, tütün məmulatlarının istifadəsinin qadağan edildiyi ictimai məkanlarda elektron siqaret çəkən şəxslər inzibati məsuliyyət daşıyacaq. Bu halda vətəndaşlar 30 manat məbləğində cərimə edilə bilər.
Bundan əlavə, elektron siqaretlərin dövriyyəsi ilə bağlı da sərt qaydalar tətbiq olunur. Belə ki, elektron siqaretlərin və onların komponentlərinin idxalı, ixracı, istehsalı, saxlanılması və satışı da inzibati xəta hesab ediləcək. Bu qaydaları pozan fiziki şəxslər 350 manatdan 500 manatadək, vəzifəli şəxslər 1650 manatdan 2200 manatadək, hüquqi şəxslər isə 4000 manatdan 5000 manatadək cərimə oluna bilər və məhsullar müsadirə ediləcək.
Qeyd edək ki, İnzibati Xətalar Məcəlləsinə edilən dəyişikliklər Azərbaycan Respublikasının Milli Məclisi tərəfindən qəbul olunub və qanun 2026-cı il aprelin 1-dən qüvvəyə minəcək. Yeni qaydaların tətbiqi ictimai yerlərdə sağlam mühitin qorunması və əhalinin sağlamlığının müdafiəsi məqsədi daşıyır.
İndi Bakı metrosunda siqaret kimi elektron siqaretlərin də istifadəsi qadağan olunmuş məkanlar siyahısına daxil edilir və bu qaydanın pozulması inzibati məsuliyyətə səbəb olacaq.
