Avropa fond bazarları cümə axşamı gününə əvvəlcə enişlə başlasa da, sonradan yenidən yüksəlişə doğru hərəkət edib. Asiya bazarlarında müşahidə olunan güclü artım Avropa səhmlərinə də müsbət təsir göstərib.
Alyans.media xarici mətbuata istinadən xəbər verir ki, bazarların diqqət mərkəzində isə davam edən İran–İsrail qarşıdurmasıdır. Münaqişə fonunda neft qiymətləri yenidən yüksəlib və bu, Avropa bazarlarında müəyyən təzyiq yaradıb.
Məlumata görə, İran cümə axşamı səhər saatlarında İsrailə qarşı yeni raket hücumları həyata keçirib. Bu hücumlar Vaşinqtonda respublikaçı senatorların ABŞ-ın İrana qarşı hava əməliyyatlarını dayandırmaqla bağlı iki partiyanın dəstəklədiyi təşəbbüsü bloklamasından bir neçə saat sonra baş verib.
Eyni zamanda, Asiya bazarlarında kəskin yüksəliş qeydə alınıb. Xüsusilə Cənubi Koreyanın KOSPI indeksi hökumətin bazarları sabitləşdirmək üçün böyük maliyyə paketi açıqlamasından sonra təxminən 10 faiz artaraq regionun ən böyük yüksəlişini göstərib.
Digər tərəfdən, Çin hökuməti 2026-cı il üçün iqtisadi artım hədəfini 4,5–5 faiz səviyyəsində müəyyən edib.
Analitiklərin fikrincə, geosiyasi gərginliklər və enerji qiymətlərinin artması dünya bazarlarında qeyri-müəyyənliyi davam etdirir. Bununla belə, Asiya bazarlarındakı güclü yüksəliş Avropa birjalarında itkilərin məhdudlaşmasına kömək edib.
Sevinc Yarməmmədova
