İlahiyyatçı Axund, Hacı Əli Əliyev İran İslam Respublikasının yeni ali dini rəhbərinin Seyid Müctəba Xameneinin seçilməsi münasibətilə təbrik edib.
Alyans.media xəbər verir ki, Əli Əliyev bəyanatında deyilir:
“Bismillahir-Rəhmanir-Rəhim
Salam olsun sizə! Böyük rəhbərimizin şəhadəti ilə bağlı dərin hüzn və kədər içində olsaq da, dünən aldığımız mühüm və ümidverici xəbər qəlblərimizə təsəlli gətirdi. Seyid Müctəba Xameneinin yeni rəhbər kimi seçilməsi xəbəri qəlblərimizdə yenidən ümid, sevinc və arxayınlıq yaratdı. Bununla bağlı olaraq, yeni mənəvi rəhbərə sədaqət və beyətimi bildirirəm.
Bu münasibətlə ilk növbədə zamanımızın imamı Həzrət İmam Mehdi (Allah onun zühurunu tezləşdirsin), eləcə də bu çətin sınaq günlərində bizimlə həmrəylik göstərən bütün İslam dünyasını, xüsusilə də cəsur İran xalqını təbrik edirəm.
Əminik ki, bu xəbər möminlərin qəlbini daha da möhkəmləndirmiş, eyni zamanda ədalətin düşmənlərini – lənətlənmiş sionist rejimini və onun tərəfdarlarını, o cümlədən Amerikanı qəzəbləndirmişdir. Lakin imanımız möhkəmdir. Həqiqət və ədalət qalib gələcək, zülm sona çatacaq və Allah onları layiq olduqları rüsvayçılığa düçar edəcəkdir.
Necə ki, Qurani-Kərimdə buyurulur:
“وَأُخْرَىٰ تُحِبُّونَهَا ۖ نَصْرٌ مِنَ اللَّهِ وَفَتْحٌ قَرِيبٌ ۗ وَبَشِّرِ الْمُؤْمِنِينَ”
‘Sevdiyiniz başqa şey də vardır: Allah tərəfindən kömək və yaxın qələbə. Möminləri (bununla) müjdələ’.
(Saff surəsi, 13-cü ayə).
Uca Allahdan diləyirik ki, yeni rəhbərə güc, hikmət və qüdrət bəxş etsin, İslam ümmətinin birliyini və həmrəyliyini daha da möhkəmləndirsin.
Hörmətlə, İlahiyyatçı Hacı Əli Əliyev Dünya Əhli-beyt (ə) Cəmiyyətinin üzvü”.
Sevinc Yarməmmədova
