Azərbaycan Respublikasında II Dünya müharibəsində Qələbənin 81-ci ildönümü ilə əlaqədar bir sıra sosial tədbirlər həyata keçiriləcək.
Alyans.media xəbər verir ki, bu barədə Prezident İlham Əliyev Sərəncam imzalayıb.
Sərəncama əsasən, 1941–1945-ci illərdə II Dünya müharibəsində iştirak etmiş şəxslərə 2 750 manat məbləğində birdəfəlik maddi yardım veriləcək.
Bununla yanaşı, müharibədə həlak olmuş və ya sonradan vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslərə, döyüş bölgələrinin arxa hüdudlarında və donanmanın əməliyyat zonalarında fəaliyyət göstərmiş xüsusi birləşmələrin əməkdaşlarına, eləcə də Leninqradın müdafiəsinə görə təltif olunan və mühasirə iştirakçılarına 1 500 manat məbləğində birdəfəlik yardım ödəniləcək.
Sərəncamın icrası məqsədilə Azərbaycan Respublikasının 2026-cı il dövlət büdcəsində nəzərdə tutulmuş Prezidentin ehtiyat fondundan 3 milyon manat vəsait ayrılacaq.
Maliyyə Nazirliyi ayrılmış vəsaitin Əmək və Əhalinin Sosial Müdafiəsi Nazirliyinin hesabına köçürülməsini təmin edəcək. Sözügedən nazirlik isə yardımın aidiyyəti şəxslərə ödənilməsini həyata keçirəcək.
Nazirlər Kabinetinə sərəncamdan irəli gələn digər məsələlərin həlli tapşırılıb.
