Orhus Universitetinin alimləri yenilənmiş Skandinaviya pəhrizinə əməl etməyin ölüm riskini əhəmiyyətli dərəcədə azaltdığını açıqlayıblar. Tədqiqat 76 000-dən çox insanın məlumatlarını əhatə edir və nəticələr göstərir ki, bu pəhriz həm sağlamlıq, həm də iqlim üçün böyük fayda verir.
Alyans.media xəbər verir ki, araşdırma The Journal of Nutrition (JN) jurnalında dərc olunub. Yenilənmiş Skandinaviya pəhriz qaydaları 2023-cü ildə təqdim edilib və yalnız qida dəyərini deyil, həm də ətraf mühitin dayanıqlığını nəzərə alır. Tövsiyələrə görə, qırmızı ət və əlavə şəkər istehlakı azaldılmalı, tam taxıl, paxlalı bitkilər, balıq və az yağlı süd məhsulları artırılmalıdır.
Tədqiqata dosent Kristina Dam və doktorant Anne Bak Merch rəhbərlik edib. Kristina Dam bildirir ki, tövsiyələrə ən çox riayət edən orta yaşlı İsveçli kişilərin və qadınların ümumi ölüm nisbəti, az riayət edənlərlə müqayisədə 23% aşağı olub. Bu nəticə təhsil, gəlir və fiziki fəaliyyət kimi faktorlar nəzərə alındıqdan sonra da etibarlıdır.
Əlavə olaraq, pəhrizə ciddi riayət edənlərdə xərçəng və ürək-damar xəstəliklərindən ölüm riski də əhəmiyyətli dərəcədə aşağıdır.
Sevinc Yarməmmədova
