Sosial şəbəkələrdə Sumqayıt şəhəri, Novxanı bağ massivi 377A ünvanında yerləşən yaşayış evində saxlanılan ev heyvanlarının guya ətraf sakinlərə narahatlıq yaratması ilə bağlı yayılan məlumatlar araşdırılıb.
Alyans.media – nın apardığı araşdırma zamanı məlum olub ki, sosial şəbəkələrdə yayılan iddialar reallığı əks etdirmir. Sözügedən bağ ərazisində təsərrüfat işləri ilə məşğul olan şəxslə əlaqə saxlanılıb və o, yayılan görüntülərin məqsədli şəkildə paylaşılaraq ictimai rəyin manipulyasiya edildiyini bildirib.
Məlumata görə, video görüntüləri paylaşan qonşu təxminən iki ay əvvəl bağ ərazisində saxlanılan ev heyvanlarından birini daşlayaraq və zəhərləyərək öldürüb. Buna baxmayaraq, bağda təsərrüfat işləri ilə məşğul olan şəxs qonşuluq münasibətlərini nəzərə alaraq bu faktla bağlı rəsmi şikayət etməyib.
Sonradan isə şəxsi münaqişə zəminində həmin qonşular icazəsiz şəkildə xüsusi mülkiyyətə daxil olaraq əmlakın və heyvanların saxlanıldığı yerlərin görüntülərini çəkib sosial şəbəkələrdə və bəzi xəbər resurslarında yaymağa başlayıblar.
Qeyd edək ki, Azərbaycan Respublikasının qanunvericiliyinə əsasən, vətəndaşın öz şəxsi mülkündə ev heyvanı saxlaması qanunla qadağan edilmir və bu hal inzibati xəta hesab olunmur.
