AZPROMO-dan verilən məlumata görə, AZPROMO və Çexiya Sənaye Konfederasiyası arasında anlaşma memorandumu imzalanıb.
Alyans.media xəbər verir ki , sənəd iki təşkilatın nümayəndələri arasında keçirilən görüş zamanı imzalanıb .
Görüşdə ikitərəfli iqtisadi əlaqələrin inkişafı və iki ölkənin işgüzar dairələri arasında birbaşa əlaqələrin genişləndirilməsi məsələləri müzakirə olunub.
AZPROMO-nun icraçı direktoru Yusif Abdullayev tədbir iştirakçılarına agentliyin fəaliyyəti barədə məlumat verib və Azərbaycan biznesinin Çexiya bazarına çıxışının dəstəklənməsinin və Çexiya şirkətləri ilə əməkdaşlıq mexanizmlərinin qurulmasının vacibliyini vurğulayıb.
Çexiya Sənaye Konfederasiyasının prezidenti Yan Rafaj ölkəsinin sənaye və texnologiya sahəsindəki təcrübəsindən danışdı və Çexiyanın Avropa bazarları və təchizat zəncirləri ilə sıx əlaqələrinin olduğunu vurğuladı.
Tərəflər məlumat mübadiləsi aparmaq, qarşılıqlı maraq doğuran sektorları müəyyən etmək və işgüzar dairələr arasında əlaqələrin inkişaf etdirilməsi üçün əlavə addımlar atmaq barədə razılığa gəliblər.
