ABŞ prezidenti Donald Tramp İranın nüvə proqramının 20 il müddətinə dayandırılmasını nəzərdə tutan yeni sazişi nəzərdən keçirməyə hazır olduğunu bildirib.
Alyans.media xəbər verir ki, Ağ Ev rəhbəri bu müddətin kifayət olduğunu, lakin zəmanət məsələsinin həlledici rol oynadığını vurğulayıb.
Prezident Tramp bəyanatında bu məqamlara toxunub:
“20 il kifayətdir. Lakin onların verəcəyi zəmanət səviyyəsinə gəlincə… Bu, həqiqi 20 il olmalıdır”.
O, həmçinin qeyd edib ki, İran tərəfinin iddiasına görə, zədələnmiş nüvə obyektlərindən zənginləşdirilmiş uranın çıxarılması üçün lazımi texnologiyaya yalnız ABŞ və Çin sahibdir. Trampın sözlərinə görə, İranın bu cür əməliyyatları müstəqil şəkildə həyata keçirmək imkanı yoxdur.
Xəbərdə o da bildirilir ki, Donald Tramp Çin Xalq Respublikasının Sədri Si Cinpinlə İran neftini alan Çin şirkətlərinə tətbiq olunan sanksiyaların ləğvi imkanlarını müzakirə edib. Bu məsələ ilə bağlı konkret qərarın yaxın günlərdə veriləcəyi gözlənilir.
Hörmüz boğazı ətrafındakı vəziyyəti şərh edən ABŞ prezidenti, Pekindən İrana təzyiq göstərməyi xahiş etmədiyini vurğulayıb:
“Mən heç bir xahiş etmirəm. Çünki xahiş edəndə, qarşılığında sən də nəsə etməlisən. Bizim heç kimin köməyinə ehtiyacımız yoxdur”, – deyə o əlavə edib.
