Alyans.media AZƏRTAC-a istinadən xəbər verir ki, Azərbaycan Respublikasının Prezidenti İlham Əliyev aprelin 28-də Qəbələdə Birləşmiş Ərəb Əmirliklərinin Xarici İşlər Nazirliyinin dövlət naziri Səid bin Mübarək Əl-Hacerinin başçılıq etdiyi nümayəndə heyətini qəbul edib .
Prezident İlham Əliyev ölkələrimiz arasında strateji tərəfdaşlığa əsaslanan ikitərəfli münasibətlərin bütün sahələrdə uğurlu inkişafını yüksək qiymətləndirdi. Bu kontekstdə dövlətimizin başçısı Birləşmiş Ərəb Əmirliklərinin Prezidenti Şeyx Məhəmməd bin Zayed Əl Nəhyan ilə dostluq münasibətlərini xüsusi qeyd etdi.
Prezident İlham Əliyev Birləşmiş Ərəb Əmirliklərinə səfərlərini, Şeyx Məhəmməd bin Zayed Əl Nəhyanın Azərbaycana, o cümlədən Qarabağa səfərlərini, eləcə də həmin səfərlər zamanı aparılan müzakirələri məmnuniyyətlə xatırladı. Dövlətimizin başçısı bütün bunların ikitərəfli münasibətlərin genişləndirilməsində mühüm rol oynadığını vurğuladı.
Prezident İlham Əliyev Səid Bin Mübarək Əl-Hacerinin Azərbaycana böyük bir nümayəndə heyəti ilə gəldiyini qeyd etdi və səfərin iki ölkə arasında münasibətlərin daha da dərinləşməsi baxımından əhəmiyyətinə toxundu.
Səid bin Mübarək Əl-Haceri qəbul üçün təşəkkürünü bildirərək Birləşmiş Ərəb Əmirliklərinin Prezidenti Şeyx Məhəmməd bin Zayed Əl-Nəhyanın salamlarını dövlətimizin başçısına çatdırdı.
Azərbaycan Prezidenti salamlara görə minnətdarlığını bildirdi və öz salamlarını Şeyx Məhəmməd bin Zayed Əl Nəhyana çatdırmağı xahiş etdi.
BƏƏ-nin dövlət naziri Azərbaycan Prezidentini Cənubi Qafqaz regionunda sülh gündəliyinin irəliləməsində onun rəhbərliyi altında qazanılan uğurlara, eləcə də Azərbaycan ilə Ermənistan arasında sülhə nail olmaq və dialoqun təşviqi istiqamətindəki səylərinə görə “Sülh və Barışıq üzrə Gernika Mükafatı”na layiq görülməsi münasibətilə təbrik etdi.
Prezident İlham Əliyev təbriklərə görə ona təşəkkür etdi və Birləşmiş Ərəb Əmirliklərinin qurucusu və keçmiş prezidenti Şeyx Zayed bin Sultan Əl Nəhyanın humanitar irsini və dəyərlərini təbliğ edən Zayed İnsan Qardaşlığı Mükafatına layiq görüldüyünü xatırlatdı.
Dövlətimizin başçısı Səid bin Mübarək Əl-Haceridən buna görə Birləşmiş Ərəb Əmirliklərinin Prezidentinə bir daha minnətdarlığını çatdırmağı xahiş etdi.
Görüşdə iki ölkə arasında ikitərəfli gündəliyin çox zəngin olduğu vurğulandı. Tərəflər siyasi, iqtisadi, ticarət, enerji, bərpa olunan enerji, birgə investisiya fondunun fəaliyyəti, birgə hərbi təlimlər və digər sahələrdə əməkdaşlıq barədə fikir mübadiləsi apardılar.
Söhbət zamanı Yaxın Şərqdəki vəziyyətə toxunuldu və bölgədəki bütün məsələlərin diplomatik yolla həllinin vacibliyi vurğulandı.
