Gorus–Qafan yolu ilə bağlı qalmaqal yenidən gündəmə gəlib.
Alyans.media xəbər verir ki, Ermənistanın sabiq müdafiə naziri David Tonoyan keçmiş müdafiə naziri Vaqarşak Arutyunyanın ittihamlarına cavab verib.
Yerli 24 TV-yə müsahibəsində Tonoyan bildirib ki, Gorus–Qafan yolunun Azərbaycan tərəfinə verilməsi ilə bağlı məsuliyyət onun üzərinə qoyula bilməz. O, yalnız 20 noyabr 2020-ci ilə qədər olan dövrə görə cavabdeh olduğunu vurğulayıb.
Tonoyanın sözlərinə görə, 9 noyabr 2020-ci il tarixli atəşkəs bəyanatında bu məsələ ilə bağlı konkret qərar yer almayıb: “20 noyabra qədər belə qərarlar qəbul olunmamışdı, danışıqlar gedirdi. Bu məsələdə Vaqarşak Arutyunyan özü daha açıq danışmalıdır”.
Jurnalistin həmin vaxt Zəngilan istiqamətinin qorunması ilə bağlı sualına cavab verən Tonoyan bildirib ki, qarşı tərəfin bu iddiaları hazırkı seçki mərhələsi ilə bağlıdır və mövzunu siyasiləşdirmək istəmir. O, əlavə edib ki, bir-birini ittiham etmək düzgün yanaşma deyil.
Keçmiş nazir siyasətə qayıdış məsələsinə də toxunaraq bildirib ki, hazırda buna hazır deyil. O, məhkəmə prosesinin davam etdiyini və əvvəlcə üzərinə atılan ittihamlardan qurtulmaq istədiyini deyib.
Hansı siyasi qüvvəni dəstəklədiyi ilə bağlı suala isə Tonoyan konkret cavab verməsə də, hakim partiyanı dəstəkləmədiyini açıqlayıb.
