Banqladeş Yaxın Şərqdə davam edən İran müharibəsinin yaratdığı enerji böhranı səbəbindən ölkədə fövqəladə tədbirlər görməyə başlayıb. Hökumət yanacaq çatışmazlığının qarşısını almaq üçün universitetləri bağlayıb və yanacaq satışına məhdudiyyət tətbiq edib.
Alyans.media xarici mətbuata istinadən xəbər verir ki, məlumata görə, ölkə üzrə bütün dövlət və özəl universitetlər bazar ertəsi günündən etibarən fəaliyyətini dayandırıb. Hakimiyyət bu addımı elektrik və yanacaq sərfiyyatını azaltmaq məqsədilə atıb və bununla əlaqədar olaraq bayram tətili də əvvəlcədən elan olunub.
Rəsmilər bildirir ki, Banqladeş enerji ehtiyacının təxminən 95 faizini idxal hesabına qarşılayır. Yaxın Şərqdə müharibənin genişlənməsi isə enerji təchizatını ciddi şəkildə pozub və ölkədə yanacaq çatışmazlığı riskini artırıb.
Paytaxt Dəkkədə və digər şəhərlərdə sürücülər mümkün qıtlıqdan ehtiyatlanaraq yanacaqdoldurma məntəqələrində uzun növbələr yaradıblar.
